Prediksyon sa Oscars 2013

Sa ikalawang taon ng blog kong ito ay nais kong ipagpatuloy ang panghuhulang ginawa ko noong isang taon tungkol sa mga mananalo sa Academy Awards o Oscars sa Amerika. Tara’t sabay-sabay tayong manghula sa iba’t-ibang kategorya sa ibaba.

BEST PICTURE. Tulad nung isang taon, napanood kong lahat ang mga kalahok para sa pinakamagandang pelikula noong 2012. Nagandahan ako sa lahat ng mga nominado, pero aaminin kong ang huli sa mga iyon ay ang Lincoln ni Steven Spielberg. Nakakaaliw ang ilang eksena ng nabanggit na pelikula pero masasabing mas habol nitong magturo ng kasaysayan kaysa mang-aliw. Sa mga nominado, pinakanagustuhan ko ang Life of Pi lalo’t napanood ko ito sa 3D. Ang galing ng pagkakagawa ni Ang Lee sa pelikulang ito! Sayang nga lamang dahil sinasabing matatalo ito ng magaling din namang Argo ni Ben Affleck.

BEST ACTOR. Napanood ko ang pagganap ng mga kalahok dito sa kani-kanilang pelikula. Mamamangha ka kay Bradley Cooper sa nakaaaliw na pagganap n’ya bilang isang lalaking may kondisyong Bipolar Disorder sa pelikulang Silver Linings Playbook. Magagalingan ka naman kay Joaquin Phoenix bilang isang kakaibang alagad ng isang cult leader sa The Master. Magaling din sina Hugh Jackman (Les Miserables) at Denzel Washington (Flight) sa kani-kanilang pelikula pero higit na magaling ang ibang tatlong nominado sa kanila. Walang duda na mag-uuwi ng parangal ngayong taon ay si Daniel Day-Lewis dahil sa kanyang natatanging pagganap bilang Abraham Lincoln sa Lincoln. Kung nominado rin siguro si John Hawkes dahil sa kanyang napakagaling na pag-arte sa The Sessions ay di masisigurong maiuuwi nga ni Day-Lewis ang parangal na ito sa pag-arte.

BEST ACTRESS. Paborito ko si Jennifer Lawrence (Silver Linings Playbook) simula pa nung magbida siya sa Winter’s Bone ilang taon na ang nakararaan. Magaling siya sa pelikulang iyon at simula noon, natatangi ang kanyang pagganap sa mga pelikulang kanyang sinasalihan. Magaling at talagang naaayon ang kanyang pagganap sa Silver Linings Playbook kaya’t di ako magtataka kung siya ang mag-uwi ng tropeo bilang pinakamagaling na aktres. Pero, malaki rin ang laban ni Jessica Chastain sa kanyang magaling na pagganap bilang agent na nasa likod ng pagkakapatay sa teroristang si Osama bin Laden sa pelikulang Zero Dark Thirty. Nakaiiyak ang pagganap ni Naomi Watts sa The Impossible at nakatutuwa naman si Quevenzhane Wallis sa Beasts of the Southern Wild. Ganunpaman, sa 5 nominado, pinakamagaling talaga ang batikang aktres na Pranses na si Emmanuelle Riva sa kanyang natatanging pagganap sa Amour.

BEST SUPPORTING ACTOR

Lahat ng mga nominado sa kategoryang ito ay nanalo na noon sa Oscars kaya kung angking galing ang pag-uusapan, walang maiiwan sa kanila. Ang pinakanatatangi nga lamang sa pagganap ay mapupunta kay Christoph Waltz dahil sa kanyang pagganap bilang isang bounty hunter sa pelikulang Django Unchained.

 

 

BEST SUPPORTING ACTRESS

Gusto kong manalo si Helen Hunt sa kategoryang ito dahil sa kanyang napakagaling na pagganap bilang isang sex surrogate sa pelikulang The Sessions. Ngunit, may mas magaling sa kanya sa katauhan ni Anne Hathaway na talagang damang-dama ang emosyong nais ipakita ng kanyang karakter sa Les Miserables. At yun ay habang kumakanta pa.

 

BEST DIRECTOR

Kung sakaling matalo ang Life of Pi sa Argo bilang pinakamagaling na pelikula, sana’y sa kategoryang ito bumawi ang pelikula sa katauhan ni Ang Lee. Talagang napakagaling at napakaganda ng pagkakagawa sa pelikulang base sa nobela ni Yann Martel. Ang nobelang inakalang di magagawang isalin sa pelikula ay naisalin ng napakaganda ni Lee, kaya’t siya ang pinakanatatanging manalo sa karangalang ito.

 

BEST ANIMATED FEATURE

Dalawa lamang sa mga nominado ang napanood ko pero ibibigay ko ang karangalang ito sa Wreck-It Ralph na isa sa mga pinakamagagandang animated feature na napanood ko simula pa nung bata ako.

 

 

 

BEST FOREIGN FILM

Dalawa pa lamang din ang napapanood ko sa kategoryang ito pero halata namang mananalo ang Amour ni Michael Haneke dito sapagkat ang pelikula lamang iyon ang nominado para sa Best Picture category. Maganda rin ang Kon-Tiki pero mas maganda ang Amour.

 

 

 

BEST ORIGINAL SCREENPLAY

Malakas ang laban ni Quentin Tarantino para sa karangalang ito sapagkat nagawa niyang sagutin ang katanungang Ano kaya ang mangyayari kung may isang Amerikanong Itim ang tutugis sa mga Puting kriminal? Lubos na nakakaaliw ang kanyang pelikula at isa sa mga dahilan nito’y ang natatanging dayalogong nakapaloob dito. Kung di si Tarantino ang mananalo, ibibigay ko ang parangal kina Wes Anderson, Roman Coppola para sa nakatutuwang pelikula na Moonrise Kingdom o kaya kay Mark Boal ng nakakabilis ng pintig ng puso na Zero Dark Thirty.

BEST ADAPTED SCREENPLAY

Kailangang manalo ng Life of Pi sa kategoryang ito sapagkat sa screenplay na ginawa ni David Magee nahulma ang istorya ni Pi sa pelikulang natatangi ang pagkakagawa ni Ang Lee. Kung matatalo man siya, sana kay Chris Terrio ng Argo sapagkat napakaganda rin ng pagkakagawa rito.

 

 

BEST ORIGINAL SCORE

Nakamamangha ang musical score na natunghayan ko sa Life of Pi kaya sa kanila ko ibibigay ang parangal na ito.

 

 

 

 

BEST SOUND EDITING

Kung hindi Life of Pi, Django Unchained o kaya Argo ang makakakuha ng parangal na ito.

 

 

 

 

 

BEST SOUND MIXING 

Magaling ang pagkakahalu-halo at pagkakalapat ng tunog sa mga eksena sa Les Miserables.

 

 

 

 

 

BEST PRODUCTION DESIGN

Life of Pi ang mag-uuwi ng parangal na ito.

 

 

 

 

 

BEST CINEMATOGRAPHY

Kung napanood mo lahat ng mga nominado sa kategoryang ito ay sasang-ayon ka sa aking ang Life of Pi ang may karapatang mag-uwi ng karangalang ito.

 

 

 

 

BEST MAKE-UP AND HAIRSTYLING

Magtataka ako kung hindi The Hobbit ang magkamit ng parangal na ito.

 

 

 

 

 

BEST COSTUME DESIGN

Kung hindi Les Miserables ay Lincoln ang mananalo rito.

 

 

 

 

 

BEST FILM EDITING

Walang duda na ang pelikulang Argo ang pinaka-suspenseful sa limang kalahok dito at nakatulong ng malaki ang magandang pagkaka-edit dito. May laban din naman ang Life of Pi at Zero Dark Thirty.

 

 

 

BEST VISUAL EFFECTS

Dalawa ang mahigpit na maglalaban sa kategoryang ito at ang mga iyon ay ang The Avengers at Life of Pi.

 

 

 

 

BEST ORIGINAL SONG

Sinasabing ang Skyfall ni Adele ang mag-uuwi ng karangalang ito.

 

 

 

Ating abangan ang Oscars ngayong araw upang malaman kung tama ba ang aking mga hinulaang mananalo. 😀

Best Movies ng Taong 2012

Panahon na naman sa Amerika ng pagbibigay ng mga parangal para sa mga pelikula. At dahil hindi ko pa nakukumpleto noon ang listahan ng mga pinakamagagandang pelikula ng taong 2012, minabuti kong tapusin na nitong nakaraang araw ang aking post sa isa ko pang blog tungkol sa mga pinakamagagandang pelikulang naipalabas noong isang taon.

Marami akong napanood na pelikula sa nakalipas na taon kaya alam ko ang marami sa talagang magaganda pero aminado rin akong marami pang pinag-usapang pelikula ang di ko pa napapanood kahit sa internet. Ganunpaman, ang lahat ng nakalista rito ay aking napanood at bawa’t isa ay talagang may kakaibang galing at ganda.

Nasa listahan sa ibaba ba ang iyong paborito?

#20 THE HUNGER GAMES

#19 THE SESSIONS

#18 LES MISERABLES

#17 SINISTER

#16 BEASTS OF THE SOUTHERN WILD

#15 KON-TIKI

#14 I DO BI- DOO

#13 CABIN IN THE WOODS

#12 WRECK-IT RALPH

#11 SILVER LININGS PLAYBOOK

#10 THY WOMB

#9 ZERO DARK THIRTY

#8 RUROUNI KENSHIN

#7 AMOUR

#6 THE AMAZING SPIDER-MAN

#5 DJANGO UNCHAINED

#4 THE DARK KNIGHT RISES

#3 ARGO

#2 THE AVENGERS

#1 LIFE OF PI

Sabah

Mainit-init na balita ngayon ang nangyayaring stand-off sa Lahad Datu, Malaysia (parte ng Sabah) gawa ng mga kababayan nating Muslim na nagpunta run bilang protesta sa nangyaring peace agreement sa pagitan ng pamahalaan at ng Moro Islamic Libreation Front (MILF) noong Oktubre ng nakaraang taon. Anila, initsapwera ang sultanato nila sa Mindanao gayung pag-aari nila ang marami sa lupaing ibibigay umano sa MILF alinsunod na rin sa nasabing kasunduang pangkapayapaan. Di man lang daw sila kinunsulta tungkol dito, gayung sila umano ang talagang may-ari ng mga lupain. Isa na sa kanilang inaangking lupa ay ang Sabah na matagal na ring sinasabing pag-aari talaga ng Pilipinas.

Nasaan ang Sabah?

Mapa ng Sabah (courtesy of rappler.com)

Ang Sabah ay isa sa 13 member states ng bansang Malaysia. Matatagpuan ito sa pinakamataas na bahagi ng Borneo, ang islang napakalapit sa Pilipinas, lalo na sa bandang Palawan at Sulu. Tingnan nyo ang mapa nang mas maintindihan nyo ang pagsasalarawan na sinabi ko.

Ano ang kasaysayan sa likod ng pag-angkin natin sa Sabah?

Ayon sa isang artikulo ng GMA News, ang sultanato ng Brunei ang talagang may kontrol sa Borneo (kung saan napapaloob ang Sabah) at ilang bahagi ng Sulu noon pa mang ika-14 na siglo. Noong Hunyo 1658, ibinigay umano ni Sultan Abdul Hakkul Mubin ng Brunei ang parte ng Sabah kay Sultan Salah-ud Din Karamat Bakhtiar ng Sulu dahil sa ginawang pagtulong ng huli sa giyerang nilahukan ng sultanato ng Brunei. Naging opisyal namang pag-aari ng sultanato ng Sulu ang Sabah noong 1673 matapos itong kumpirmahin ni Brunei Sultan Bongsu Muhyuddin. Noong ika-18 at ika-19 na siglo ay pinarentahan ng sultanato ng Sulu ang Sabah sa ilang kumpanya ng Britanya. Nang dumating ang ika-20 siglo ay gusto na muling angkinin ng ating mga kababayang Muslim ang kanilang teritoryo ngunit hindi ito naging madali sapagkat nagkaroon ng Ikalawang Digmaang Pandaigdig; naging kolonya ng Britanya ang North Borneo, kung saan bahagi ang Sabah (1946); at naging parte ng iisang bansang tinawag na Malaysia ang Sabah kasama ng Malaya, Sarawak at Singapore (1963). Ang pinakakontrobersyal na hakbangin noon ng mga Pilipino ay ang tinatawag na Operation Merdeka kung saan halos 200 Tausug at Samang Muslim na 18 hanggang 30 ang gulang ay kinuha at inensayo sa Simunul, Tawi-tawi. Ang commando unit na ito ay tinawag na Jabidah. Disyembre 30, 1967 nang pinasakay sa Philippine Navy Vessel patungong Corregidor ang Jabidah upang sumailalim sa special training. Nagkaroon nga lamang ng aberya nang malaman ng mga nabanggit na trainee na nasa plano ang pagsagupa nila sa mga kapatid nilang Muslim din na nasa Sabah. Marso 18, 1968 nang mangyari ang tinatawag na Jabidah Massacre, kung saan ang mga trainee ay pinaulanan ng bala sa di tiyak na kadahilanan. Mula nang mangyari ang insidente, di na muling uminit pa ang usaping Sabah hanggang nangyari nga ang stand-off nitong nagdaang linggo.

Sino ba talaga ang nagmamay-ari sa Sabah?

Di natin matitiyak yan, pero base sa mga naibalita ay talagang pag-aari ng mga kababayan nating Muslim ang Sabah. Bukod diyan, hanggang ngayon daw kasi ay binabayaran sila ng Malaysia sa ginawa nilang pagpapaupa rito mula pa noon. Maiisip mo nga, bakit nagbabayad pa rin hanggang ngayon ang mga Malay kung di nila binibigyang halaga ang naging usapan higit isang siglo na ang nakakaraan, hindi ba?

Huling Salita

Napakaraming taon nang usapin ang pag-angkin ng bansang Pilipinas sa Sabah. Kung sakaling tulungan ng gobyerno ng Pilipinas ang mga kapatid nating Muslim na nandoon ngayon upang mabawi ang lupang sarilling atin talaga, magiging handa ba tayo sa mga maidudulot nito? Magiging atin ang lupa pero ang mga taong nakatira rito’y Malay (taong tawag sa mga taga-Malaysia) na ang turing sa kanilang mga sarili. Hindi sila papayag sa ganun sapagkat identidad na nila ang nakataya roon. Bukod dyan, di basta-basta papayag ang gobyerno ng Malaysia na maangkin nating muli ang Sabah. Marami silang nakukuhang yaman at pinagkukunang-yaman dito na pinakabukod-tangi’y ang mga mamamayan nila na nakatira roon.

Sa madaling salita, hindi tayo handa. Kaya di na kataka-takang ayaw sumuporta ng gobyerno sa isinasagawang protesta roon ngayon.

Maselang Usapan

Nitong nakaraang araw, Pebrero 9, 2013, ay ibinalita ang pagkastigo sa programang Party Pilipinas ng The Movie and Television Review and Classification Board (MTRCB) dahil sa pagpapalabas ng isang mahalay na production number. Tama ba ang MTRCB sa kanilang ginawa? Ating alamin.

Ano ba ang nangyari?

Enero 27, 2013 nang ipalabas ang nasabing kontrobersyal na production number. Tampok dito ang mga artistang sina Lovi Poe at Rocco Nacino na habang sumasayaw ay iginigiling ang kanilang mga katawan na tila nagpapahiwatig na sila’y nagniniig.

Anong problema rito? Palabas ang programa tuwing tanghaling tapat ng Linggo, kung kailan maraming mga bata ang nanonood kasama ng kanilang pamilya. Kaya di kataka-takang marami ang nag-react agad sa mga social networking sites tulad ng Facebook at Twitter tungkol dito. Kinondena ng mga taong nakapanood ang programa sapagkat pinahintulutan nila itong mangyari. Anila, may tamang panahon at oras para sa mga ganitong uri ng pagpapalabas.

Ano kayang dahilan at ipinalabas ang nasabing production number?

Tila naging pabaya ang mga taong nasa likod ng programa sapagkat di nila naisip kung naaayon ba sa panahon ng pagpapalabas nila ang ganung uri ng production number. Huwag naman sanang ang dahilan ay upang mapukaw ang atensyon ng mga tao lalo na’t talo ang programang Party Pilipinas ng katapat nitong musical-variety show din na ASAP. Kahit pa sabihing nakuha nga nila ang atensyon ng mga tao kahit na sa hindi magandang paraan, napukaw pa rin nila ang atensyon nila. Sabi nga sa mga katagang Ingles, negative publicity is still publicity. Abangan na nga na lang natin kung may magiging epekto nga ito sa kanilang ratings.

Ano bang pwedeng maging epekto ng ganung pagpapalabas sa mga bata?

Alam nating lahat na kung anong nakikita ng bata ay kanilang ginagawa. Kahit na insinuwasyon lamang ang nakita sa palabas, di maiiwasang magtaka sila kung ano ang nakikita nila. Maaari silang magtanong, sapagkat di pa nila ito nalalaman. Yun nga lang, tatanungin nga ba nila ang kanilang mga magulang tungkol dito? At kung magtanong man sila, sasagutin ba sila ng tama at maayos ng kanilang mga magulang?

Isa pa, may mentalidad ang ibang tao na kung anong nakikita nila sa mga palabas tulad ng telebisyon at pelikula ay nagiging isang lisensya para sa kanilang gawin ang mga ito. Inaakala kasi nilang kung anong nakikita nilang ginagawa ng kanilang mga paboritong artista ay dapat nilang gawin, tama man ito o mali. Dapat mahinto ang mentalidad na ito sapagkat di porke’t kilala ang mga sikat ay magandang modelo na sila sa mga tao, lalo na sa kabataan.

Anong ginawang aksyon ng MTRCB?

Ayon sa balita, sa loob ng anim na buwan ay mamatiyagan ng ahensiya ang Party Pilipinas. Kung sila’y magkaroong muli ng violation ay papatawan sila ng parusang magpapawala sa kanilang programa sa ere. Binigyang utos din nilang magbigay ng report ang GMA-7 (channel na nagpapalabas ng Party Pilipinas) tungkol sa ginagawa umano nitong internal investigation tungkol sa nangyaring insidente. Ngayong araw din ay inaasahang hihingi ng tawad ang mga taong nasa likod ng programa sa pamamagitan ng isang public apology sa kanilang palabas. Ang mga taong tinuturong may sala sa nangyari, kasama na sina Jose Mari Abacan (VP for Programming), Mark Reyes V (director ng programa) at Lui Cadag (executive producer) ay kinakailangang kumuha ng Gender and Development (GAD) Training para umano magkaroon ng epektibong self-regulation ang programa ukol sa gender sensitivity sa kanilang ipinapalabas.

Huling Salita

Sana’y magsilbing aral sa lahat ng mga nagtatrabaho sa mga palabas sa telebisyon ang nangyari sa Party Pilipinas na kinukondena ngayon dahil sa nagawang mali ng mga tao sa likod nito. Di naman siguro mahirap maging sensitibo. May klasipikasyon din namang binibigay ang MTRCB sa mga pinapalabas sa telebisyon. Maraming paraan upang mapukaw ang atensyon ng mga tao, lalo na’t libre lang naman ang panonood ng telebisyon. Pagandahin ang programa at pagbutihin ang ginagawa ay mga sapat nang paraan. Di na kinakailangan pang magpakita ng mga bagay na maselan.

Sandaang Libo

Mahigit isang taon na mula nang simulan ko ang aking kauna-unahang blog sa WordPress na pinamagatan kong ALAMIN MO KASI. Sabi ko nga sa blog kong ito, ang aking pakay sa paggawa nito’y upang alamin ang mga bagay na nakakaapekto sa atin, tuklasin ang mga bagay na di pa natin nalalaman at gunitain ang mga bagay na dati na nating alam. Di ko akalaing isang taon pagkatapos kong ihayag ang aking kauna-unahang blog post ay aabot na ng isandaang libo ang bumasa o kaya’y dumaan (man lang) sa aking website. Lubos ang aking pasasalamat sa lahat ng bumasa at patuloy na bumabasa sa blog kong ito. Asahan n’yong susubukan kong maparami pa ang mga aalamin nating mga bagay-bagay sa mundo!