Larawan

Bohol, Philippines

Bohol, Philippines

Isang salawikain ang nagsasabing kayang ipinta ng isang larawan ang isang libong salita. Totoo ito. Sa bawa’t larawan o litrato kasing nakukuha, maraming kwento ang mahihinuha. Sa bawa’t nahuling galaw ng ngiti, ekspresyon ng mga mata, kumpas ng mga kamay at postura ng katawan ay nagbibigay kahulugan sa imahe ng mga taong makikita sa isang larawan. Bawa’t kulay at anino ay nagbibigay-diin sa bawa’t detalyeng makikita sa larawan. Bawa’t anggulo ay sumisenyas kung saan ilalagay ang atensyon sa pagtingin sa isang larawan. Aminin nating hindi lahat ng larawan ay maganda kaya’t bigyan natin ng halaga ang bawa’t isang magandang larawan. Alam naman nating sa likod ng bawa’t imaheng makikita sa isang larawan ay may kwento itong kasama.

Buong Pamilya sa Hong Kong!

Buong Pamilya sa Hong Kong!

Sino ang nakaimbento ng litrato?

Ang larawan o litrato ay nalilikha sa pamamagitan ng paggamit ng camera. Kaya ating malalaman ang kasaysayan nito sa imbensyon ng camera. Ayon sa Wikipedia, si Joseph Nicephor Niepce, isang imbentor na Pranses ang siyang unang nakalikha ng isang permanenteng larawan na kuha sa kamerang naimbento naman nina Charles at Vincent Chevalier noong taong 1826.

Narito pa ang ilan sa mga mahahalagang pangyayari sa pagkakagawa ng kamera:

1837– Nakalikha ng larawan si Jacques Mande Daguerre sa pamamagitan ng kanyang kamera na tinatawag na Daguerreotype. Hindi umano kumukupas ang larawang kuha mula rito at kinailangan lamang ng 30 minuto ng exposure.

1841– Nilikha ni William Henry Talbot ang prosesong tinatawag na Calotype– ang kauna-unahang negative-positive printing process na naglalayong makapag-develop ng maraming kopya ng isang larawan.

1851– Nilikha ni Frederick Scott Archer ang prosesong tinatawag na Collodion process, na nangangailangan lamang ng 2-3 segundo ng exposure sa ilaw na nanggaling sa araw upang makuha ang larawan.

1871– Inimbento ni Richard Leach Maddox ang prosesong tinatawag na gelatin dry plate silver bromide process kung saan di na kinakailangang ipa-develop agad ang negatibo para makalikha ng larawan.

1880- Itinatag ang Eastman Dry Plate Company, na isa sa magtataguyod ng pag-unlad ng camera.

1888– Inimbento ng Eastman ang Kodak roll film camera.

1900– Inilabas ang unang mass-marketed camera na tinatawag na Koday Brownie.

1913-1914– Ang kauna-unahang 35mm still camera ay nagawa

1927– Ang kumpanya ng kuryenteng tinatawag na General Electric ay nakaimbento ng isang modernong flash bulb na naglalayong mas mabigyan ng liwanag ang larawang kinukuha.

1948- Naimbento ni Edwin Land ang Polaroid camera.

1963– Inilbas ng Polaroid ang tinatawag na instant colour film

1978– Inimbento ng Konica ang point and shoot auto focus camera

1980– Nagdaos ng demonstrasyon sa paggamit ng camcorder ang kumpanyang Sony.

1984– Ipinakita naman ng Canon ang tinatawag na electronic still camera.

1985– Inilabas ng Pixar ang digital imaging processor.

1990– Inilabas ng Kodak ang tinatawag na photo CD bilang digital image storing device

Siete Picados, Coron, Palawan

Siete Picados, Coron, Palawan

Sa ngayon, tila pinakaginagamit na ng mga tao ang tinatawag na digital photography sa pamamagitan ng mga cell phone at digital camera. Ayon sa Wikipedia, and digital photography ay gumagamit ng electronic photodetectors upang kumuha ng larawang nai-focus ng lente ng kamera. Ang nakuhang larawan ay nadi-digitize at naiaambak bilang isang computer file na maaari nang makita agad, i­-proseso o kaya i-print.

Shameless plug

Alam natin ang kahalagahan ng larawan at magandang malaman na may mga taong gumagawa ng magandang paraan para mas mabigyan ng atensyon ang mga larawang nakuha at palaging maalala ang mga kwento sa likod nito. Sila yung mga taong gumagawa ng photo-book. Inilalapat at inoorganisa nila ang mga larawan at inaayos ang paglalagyan ng mga ito sa isang libro na tinatawag ngang photo-book.

Projects by Jennifer Dumaraos

Projects by Jennifer Dumaraos

Dalawa sa mga pasyon ng aking kasintahan ay ang pagkuha ng mga larawan at pag-aayos ng mga ito sa isang photo-book. Maaari kayong magpagawa sa kanya upang maranasan n’yo ang pagbalik sa nakaraan sa pamamagitan ng pagtingin muli sa mga larawan na nasa isang magandang libro. Bisitahin n’yo ang kanyang website, ang http://projectsbyjennifer.portfoliobox.me/projects-by-jennifer_home-page upang makita ninyo ang ilan sa mga kuha n’yang litrato mula sa iba’t-ibang panig ng ating bansang Pilipinas at Korea. Inyo ring mamamalas doon ang ilan sa nagbigay-tiwala sa kanyang kakayahan sa pagkuha ng mga larawan. Tulad ng sinabi ko kanina sa itaas, isa itong promosyon, pero layunin ko ring makatulong sa mga taong nagtataka kung ano ang photo-book pati na ang mga naghahanap sa mga taong gumagawa nito. Alam nating kakaibang ligaya at saya ang naidudulot ng mga larawan kaya marapat lang na ating malaman ang tungkol dito.

Panglao, Bohol

Ang Aba pero Kapaki-pakinabang na Text

Text (kuha mula sa mushamommy.tumblr.com)

Dalawampung taon na pala ang text messaging o tinatawag ding Short Message Service (SMS).

Sa totoo lang, di ko akalaing may nagti-text na pala noong 5 taong gulang pa lamang ako. Nagkamalay lamang ako tungkol sa cellphone at ang mga nagagawa nito noong magtatapos na ako sa mababang paaralan.

Alamin natin dito kung ano ang mga detalye sa pagkakaimbento ng text. Ayon sa artikulo ng CTV News, malalaman nating:

  • Si Neil Papworth ang kauna-unahang nagpadala ng text. Siya ay isang 22-taong-gulang na inhinyerong  Briton na nagpadala ng text mula sa kanyang computer papunta sa cellphone ng kanyang amo sa Vodaphone, isang kumpanya ng cellphone.
  • “Merry Christmas” ang mensaheng nakapaloob sa unang text
  • December 3, 1992 ang petsa noong naimbento ang text

Rebolusyonaryo ang pagkakaimbento sa text. Isa ito sa mga pinakamagandang feature ng cellphone, isa naman sa mga pinakaimportanteng naimbento nitong mga nagdaang dekada. Bakit ba naman hindi? Ang komunikasyon ay napapadali dahil sa text. Ang mga magkakapamilyang malayo sa isa’t-isa ay napapadali ang ugnayan sa isa’t-isa. Ganun din ang mga mag-kasintahan at magkakaibigan, magkalayo man sila o hindi. Mabilis at mura ang uri ng komunikasyon na ito kaya talagang patuloy na ginagamit ng mga tao. Katunayan n’yan, sinabi sa artikulong nabanggit sa itaas na 3 sa 4 na katao sa buong mundo ay mayroong cellphone at trilyong text ang napapadala araw-araw. Ganun karami ang gumagamit ng text messaging!

Nabanggit sa artikulo na lampas na raw sa rurok ng pinakakasikatan nito ang naabot ng text. Nandyan na raw kasi ang instant messaging at voice-messaging lalo na’t mayroon ito sa mga makabagong uri ng cellphone. Kung iisipin mong bauti, di naman ganun-ganung mawawala na lamang ang text lalo na sa mga bansang kakaunti pa lamang ang nakakapag-access sa internet gamit ang mga cellphone. Ilan lang ba sa mga kakilala natin ang mga may cellphone na laging online? Ilan ba sa kanila ang umaasa na lamang sa IM?

Kay Neil na nakaimbento ng isa sa mga pinakaimportanteng imbensyon sa mundo, maraming, maraming salamat! Dahil sa’yo, mas madaling nakakapag-ugnay ang mga tao saan mang parte sila ng mundo naroroon.

Kung gusto n’yo pang magbasa tungkol sa kasaysayan ng text messagingbasahin ang artikulong ito.

Buwan ng Wika

Ang buwan ng Agosto ay ang tinaguriang Buwan ng Wika ng Pilipinas. Naaalala n’yo pa ba kung bakit? At saka, naaalala n’yo pa bang hindi Buwan ng Wika ang ating ipinagdiriwang kundi Linggo ng Wika lamang? Kung hindi na, sabay-sabay nating balikan ang kasaysayan ng isa sa mga pinakamahalagang pagdiriwang sa buong bansa dito sa blog post kong ito.

Ayon sa Wikipilipinas, ilan sa mahahalagang pangyayari sa pagsisimula ng selebrasyon natin ng Buwan ng Wika ay ang mga sumusunod:

Marso 26, 1946– Ipinalabas ni Pangulong Sergio Osmena ang Proklamasyon Blg. 35 na nagtatalaga ng petsa Marso 27 hanggang Abril 2 bilang Linggo ng Wika.

Setyembre 23, 1955- Iniutos ni Pangulong Ramon Magsaysay sa kanyang Proklamasyon Blg. 186 na ilipat ang selebrasyon ng Linggo ng Wika papuntang Agosto 13- 19. Bilang paggunita umano ito sa kaarawan ni Manuel L. Quezon na tinaguriang Ama ng Wikang Pambansa.

Agosto 12, 1988- Inilabas ni Pangulong Corazon Aquino ang Proklamasyon Blg. 19 upang pagtibayin ang pagdideklara ng pagdiriwang ng Linggo ng Wika mula Agosto 13 hanggang 19 kada taon.

Enero 15, 1997- Ipinagtibay ni Pangulong Fidel V. Ramos sa pamamagitan ng Proklamasyon Blg. 1041 na tataguriang buwan ng wika ang buong buwan ng Agosto bilang pagpapalawig pa ng selebrasyong Linggo ng Wika.

Bakit mahalaga ang pagdiriwang ng Buwan ng Wika?

Upang sagutin yan, mahalagang malaman ang kahalagahan ng wika. Ang wika, o language sa Ingles, ay isang sistematikong pamamaraan ng pakikipag-ugnayan sa pamamagitan ng mga tunog, senyas o simbolo sa kapwa taong gumagamit at nakaiintindi rin ng pamamaraang ito. Ayon naman sa blog ni Romano Redublo na isang guro, ang wika raw ay kalipunan ng mga simbolo, tunog at mga kaugnay na batas upang maipahayag ang nais sabihin ng kaisipan. Ginagamit ang pamamaraang ito sa pagpapaabot ng kaisipan at damdamin sa pamamagitan ng pagsasalita at pagsulat. Ang wika rin ay likas na makataong pamamaraan ng paghahatid ng mga kaisipan, damdamin at mga hangarin sa pamamagitan ng isang kaparaanang lumilikha ng tunog; at kabuuan din ito ng mga sagisag sa paraang binibigkas. Sa pamamagitan nito, nagkakaugnayan, nagkakaunawaan at nagkakaisa ang mga kaanib ng isang pulutong ng mga tao.

Sa madaling salita, mahalagang ipagdiwang ang wika sapagkat isa ito sa mga pinakimportanteng bahagi ng ating pagka-Pilipino at pagkatao. Sa totoo lang, di tayo magkakaintindihan kung wala tayong wika o kahit anong uri ng lengwaheng ginagamit.

Para sa akin, pinakamasaya sa buwan ng Agosto ang pagdiriwang sa mga eskwelahan at pamantasan ng Buwan ng Wika. Sa aking pagkakaalala, kadalasang ikatlo o ikaapat na linggo ng buwang ito isinasagawa ang mga aktibidad na may kaugnayan sa pagsasanay at pagtataguyod ng ating pambansang wika. Malamang ay naaalala n’yo pa ang mga sumusunod:

–          Sabayang pagbigkas

–          Balagtasan

–          Isahang awit

–          Dalawahang awit

–          Paggawa ng poster

–          Paggawa ng slogan

–          Paggawa ng tula

–          Paggawa ng sanaysay

–          Pagbigkas ng tula, at marami pang iba

Sumali ako kasama ng ilang kaibigan/ kaklase sa balagtasan pero di pinalad na manalo. Buti na lang mabait ang Panginoon dahil nakasungkit naman ako noon ng medalya sa paggawa ng tula. Hehe. Gayunpaman, ang mahalaga naman sa mga paligsahang ito ay di lamang pagtatagisan ng galing kundi pagpapayabong pa ng wika natin sa iba’t-ibang pamamaraan.

Bilang pangwakas, nais kong ibahagi ang sinabi ng ating pambansang bayaning si Jose Rizal tungkol sa kahalagahan ng wika.

Ang hindi magmahal sa sariling wika ay higit pa sa hayop at malansang isda; kaya ating pagyamaning kusa, gaya ng inang sa atin ay nagpala.